ᓄᓇᓯ ᒥᑦᓵᓄᑦ

ᓄᓇᓯ ᑕᑯᓐᓇᒐᖓ ᐱᓂᐊᕐᓂᕋᐅᑎᒥᓄᑦ

ᓄᓇᓯ ᑕᑯᓐᓇᒐᖓ ᐊᔪᕐᓇᖏᓐᓂᓕᒫᖓᒍᑦ ᖄᖏᕐᓂᑯᓕᐅᖅᑎᑦᓯᖃᑦᑕᓂᕐᒥᒃ ᓇᖕᒥᓂᖁᑎᖃᖃᑕᐅᔪᖁᑎᑦᑎᓐᓂᒃ ᐊᒻᒪᓗ ᓴᖅᑮᖃᑦᑕᓂᕐᒥᒃ ᐱᓕᒻᒪᒃᓴᐃᓂᕐᒥᒃ, ᐃᖅᑲᓇᐃᔮᓂᒃ, ᐊᒻᒪᓗ ᒪᑭᒪᔾᔪᑎᒃᓴᓂᒃ ᐃᓄᖕᓄᑦ ᓄᓇᕗᒻᒥ ᑎᒍᓯᕙᓪᓕᐊᒍᑎᒃᓴᖏᓐᓄᑦ ᖃᐅᔨᒪᓂᕐᒥᒃ ᐱᓕᒻᒪᒃᓯᒪᓂᕐᒥᓪᓗ ᐱᓕᕆᐊᖃᕐᓯᒪᓂᕐᒥᒍᑦ ᐊᔪᕈᓐᓃᕈᑎᒃᓴᖏᓐᓄᑦ ᐱᕚᓕᕐᓯᒪᓂᕐᒥᒃ ᒪᑭᒪᓂᕐᒥᒃ ᓇᖕᒥᓂᖅ.

ᓄᓇᓯ ᑐᕌᒐᖓ

ᓄᓇᓯ ᑯᐊᐳᕇᓴᒃᑯᑦ ᐊᖏᕐᓯᒪᓂᒃᑯᑦ ᑐᓂᓯᒪᓂᓖᑦ
ᖃᑭᒪᑦᓯᓂᐊᕐᓂᕐᒥᒃ ᓄᓇᕗᒻᒥᐅᓂᒃ. ᓄᓇᓯ ᐱᕚᓪᓕᑎᑦᓯᓂᐊᖅᑐᖅ ᓇᖕᒥᓂᖁᑎᖃᖃᑕᐅᔪᖁᑎᑦᑕ ᑎᒍᒥᐊᖅᑕᖏᓐᓂᒃ ᑮᓇᐅᔭᓕᐅᕋᓱᐊᕈᑎᓂᒃ ᑎᒍᒥᐊᖅᑕᐅᔪᓂᒃ ᐊᑑᑎᖃᕐᓂᐹᒃᑯᑦ ᓇᖕᒥᓂᖃᕐᓂᒃᑯᑦ ᑮᓇᐅᔭᓕᐅᕋᓱᐊᕈᑎᒥᓂᒃ. ᓄᓇᓯ ᐃᑲᔪᕐᓯᓯᒪᔪᑦ ᓇᖕᒥᓂᖁᑎᖃᖃᑕᐅᓂᕐᒧᑦ ᑎᒍᒥᐊᖅᑎᖁᑎᑦᑕ ᑐᑭᒧᐊᒍᑎᒃᓴᓕᐊᕆᓯᒪᔭᖏᓐᓂᒃ ᓯᕗᓪᓕᐸᐅᔾᔭᐅᔭᕆᐊᓕᖕᓂᑦ ᐃᖅᑲᓇᐃᔮᓄᑦ ᐱᓕᒻᒪᒃᓴᐃᓂᕐᒧᓪᓗ, ᑖᒃᑯᓄᓐᖓᖓᔪᓂᒃ ᐊᕙᑎᒧᑦ ᐃᓕᖅᑯᓯᕐᒧᓪᓗ, ᐃᓅᓯᕐᒧᑦ ᒪᑭᒪᔾᔪᑎᓄᓪᓗ ᐱᕚᓪᓕᕈᑎᒃᓴᖏᓐᓄᑦ ᐃᓄᐃᑦ.

ᓄᓇᓯ ᑯᐊᐳᕇᓴᒃᑯᑦ 100% ᓄᓇᕗᒻᒥ ᐃᓄᐃᑦ ᓇᖕᒥᓂᖁᑎᓪᓚᑦᑖᖓ ᐊᒻᒪᓗ ᓄᓇᕗᒻᒥ ᓇᖕᒥᓂᖁᑎᒋᔭᐅᔪᖅ ᐱᕙᓪᓕᐊᔾᔪᑎᒃᓴᓄᑦ ᑲᒻᐸᓂ.

1976-ᒥ ᐃᓄᐃᑦ ᑕᐱᕇᑦ ᑲᓇᑕᒥ ᓴᖅᑭᑎᑦᓯᓚᐅᖅᑐᑦ ᐃᓄᐃᑦ ᐱᕙᓪᓕᐊᔾᔪᑎᒃᓴᖏᓐᓂᒃ ᑯᐊᐳᕇᓴᓂᒃ (ᒫᓐᓇ ᑕᐃᔭᐅᓕᖅᑐᑦ ᓄᓇᓯ ᑯᐊᐳᕇᓴᓐ). ᑯᐊᐳᕇᓴᒃᑯᑦ ᓴᖅᑭᖅᑕᐅᒍᑎᖃᓚᐅᖅᑐᑦ ᐃᑲᔪᕐᓯᔭᐅᓯᒪᒍᑎᒃᓴᖃᖁᓪᓗᒋᑦ ᐃᓄᐃᑦ ᖃᐅᔨᒪᔭᐅᓂᖃᑦᓯᐊᕐᓗᑎᒃ ᒪᑭᒪᔾᔪᑎᒃᓴᓄᑦ.

ᐅᓪᓗᒥ, ᓄᓇᓯ ᑮᓇᐅᔭᓕᐅᕋᓱᐊᕈᑎᒃᓴᖃᓕᖅᑐᑦ ᐃᓪᓗᓕᐅᖃᑦᑕᓂᒃᑯᑦ, ᐃᖏᕐᕋᔾᔪᑎᓂᒃ, ᓂᐅᕕᕐᕕᖕᓂᒃ, ᓱᓇᒃᑯᑖᖃᖅᑎᑦᓯᔨᐅᓂᕐᒥᒃ, ᓯᕗᒧᐊᒃᑎᑦᓯᕙᓪᓕᐊᓂᕐᒥᒃ, ᐅᖅᓱᐊᓗᖃᐅᑎᖃᕐᕖᑦ ᓱᓇᒃᑯᑖᓪᓗ, ᐋᓐᓂᐊᕐᕕᓕᐊᖅᑐᓄᑦ ᑐᔪᕐᒥᕖᑦ, ᓇᕿᑦᑕᑐᐃᓐᓇᕆᐊᓕᒃᑯᑦ ᑐᓴᐅᒪᔾᔪᑎᑦ ᐊᒻᒪᓗ ᓴᓇᔨᐅᓂᕐᒥᒃ.