ᐋᓂ ᐊᓐᓂᕐᒥᐅᖅ ᓅᓚᐅᖅᑐᖅ ᒐᕙᒪᒃᑯᓐᓂ ᐊᒻᒪᓗ ᑮᓇᐅᔭᓕᐅᕋᓱᐊᖅᑎᐅᙱᑦᑐᒥᑦ ᐃᑲᔪᕐᓂᐊᕐᓗᓂ ᐃᓄᓐᓂᑦ ᓇᒻᒥᓂᖃᕈᒪᔪᓂᒃ ᐱᕙᓪᓕᐊᓂᐊᖅᑐᓂᑦ ᐃᑲᔪᖅᑎᐅᓗᓂ
ᐋᓂ ᐊᓐᓂᕐᒥᐅᖅ ᓅᓚᐅᖅᑐᖅ ᒐᕙᒪᒃᑯᓐᓂ ᐊᒻᒪᓗ ᑮᓇᐅᔭᓕᐅᕋᓱᐊᖅᑎᐅᙱᑦᑐᒥᑦ ᐃᑲᔪᕐᓂᐊᕐᓗᓂ ᐃᓄᓐᓂᑦ ᓇᒻᒥᓂᖃᕈᒪᔪᓂᒃ ᐱᕙᓪᓕᐊᓂᐊᖅᑐᓂᑦ ᐃᑲᔪᖅᑎᐅᓗᓂ
“ᓄᓇᓕᓐᓄᑦ ᐅᑎᕈᒪᒐᓗᐊᖅᑐᖓ ᐅᕙᓐᓄᑦ ᑕᒪᓐᓇ ᐱᒻᒪᕆᐅᓚᐅᖅᑐᖅ, ᐱᓕᕆᓪᓗᖓ ᐃᓄᓐᓄᑦ ᑲᑐᔾᔨᖃᑎᒌᓐᓄᑦ ᐃᓄᐃᑦ ᓇᒻᒥᓂᖁᑎᖓᓐᓄᑦ ᐊᖏᔪᐊᓗᒻᒪᑦ,” ᐅᖃᖅᑐᓂ ᐋᓂ ᐊᓐᓂᕐᒥᐅᖅ, ᑎᒃᑯᐊᖅᑕᐅᕋᑖᓚᐅᖅᑐᖅ ᐊᖏᔪᖅᑲᑉ ᑐᖏᓕᖓᓐᓄᑦ ᒐᕙᒪᓕᕆᓂᕐᒧᑦ ᓄᓇᓕᕆᓂᕐᒧᓪᓗ ᐱᓕᕆᔨᐅᓂᐊᖅᑐᓂᑦ ᓄᓇᓯ ᑯᐊᐳᕇᓴᒃᑯᓐᓄᑦ.
ᐊᔾᔨᓕᐅᕆᓯᒪᔪᖅ ᐋᓂ ᐊᓐᓂᕐᒥᐅᖅ
ᐋᓂ ᐊᓐᓂᕐᒥᐅᖅ ᐅᑎᕈᒪᑦᑎᐊᖅᑐᖅ ᓄᓇᕗᒻᒧᑦ, ᒫᓐᓇᓗ ᐊᓯᐊᓂ ᐱᕆᓂᐊᓕᖅᑐᑎᑦ ᓯᓚ ᒪᓕᓪᓗᒍ ᐳᕝᕕᕆᓐᓈᓘᒐᓗᐊᖅᑎᓪᓗᒍ − ᓄᑖᕐᒥᑦ ᐃᖅᑲᓇᐃᔭᖃᓕᕐᖓᑦ.
ᐊᓐᓂᕐᒥᐅᖅ ᒫᓐᓇᕈᓗᒃ ᓄᓇᓯ ᑯᐊᐳᕇᓴᒃᑯᓐᓄ ᐊᖏᔪᖅᑳᖅᑖᖑᓚᐅᖅᑐᖅ ᑐᖏᓕᕆᓂᐊᖅᑐᓂᐅᒃ ᒐᕙᒪᓕᕆᓂᕐᒧᑦ ᓄᓇᓕᓐᓂᓪᓗ ᐱᓕᕆᔨᐅᓗᓂ.
ᐋᑐᐋᓯᐅᑕᐅᓯᒪᔪᖅ ᐅᑭᐅᓄᑦ ᖁᓕᓄᑦ, ᐊᕐᕌᒎᓗᐊᖅᑐᒥ ᓄᓇᖓᓐᓃᓚᐅᖅᓯᒪᙱᑦᑐᖅ ᐳᕝᕕᕆᓐᓇᖅ ᐱᔾᔪᑎᒋᓪᓗᒍ. ᑭᓯᐊᓂᓕ ᐅᑎᖅᑕᖃᑦᑕᕈᒪᔪᖅ ᖃᖓᑕᖃᑦᑕᕐᓗᓂ ᐃᑲᔪᕈᒪᓪᓗᓂ ᓄᓇᕗᒻᒥᐅᓂᑦ ᓄᓇᓯ ᐱᕈᖅᐸᓪᓕᐊᑎᒍᒪᓪᓗᒍ ᓇᒻᒥᓂᕆᔭᐅᔪᖅ.
“ᑕᒪᓐᓇ ᐱᕕᖃᕐᓂᐅᔪᖅ, ᓴᖅᑭᕐᖓᑦ, ᐱᐅᔪᐊᓘᓚᐅᖅᓯᒪᔪᖅ ᐅᕙᓐᓄᑦ ᐅᐱᓐᓇᕋᓂ ᐅᑎᕋᔭᖅᑐᖓ ᐅᑭᐅᖅᑕᖅᑐᒧ. ᐅᑎᕈᒪᑦᑎᐊᕋᒪ ᓄᓇᓕᓐᓄᑦ ᐱᒻᒪᕆᐊᓘᒻᒪᑦ ᐅᕙᓐᓄᑦ, ᐱᓕᕆᖃᑎᖃᕐᓗᖓ ᐃᓄᓐᓂᑦ ᑲᑐᔾᔨᖃᑎᒌᓐᓂᒃ ᓇᒻᒥᓂᕆᔭᐅᔪᓂᒃ ᐃᓄᓐᓄᑦ ᐊᖏᔪᐊᓗᒻᒪᑦ,” ᐅᖃᖅᑐᓂ ᐊᖏᕐᖓ ᐃᖅᑲᓇᐃᔮᖅ ᒪᓂᒪᔾᔪᑕᐅᓕᕐᖓᑦ.
ᐊᓐᓂᕐᒥᐅᖅ ᐸᓐᓂᖅᑑᒥᐅᑕᔅᓴᔭᖅ, ᐊᔾᔨᐸᓗᖏᓐᓂ ᐱᓕᕆᐊᓂᒃ ᐱᔪᓐᓇᑦᑎᐊᖅᑐᖅ ᓄᓇᓯᒃᑯᓐᓂ − ᐃᓄᐃᑦ ᑲᑐᔾᔨᖃᑎᒌᓐᓂ ᐊᒻᒪᓗ ᐃᓄᐃᑦ ᐱᕙᓪᓕᐊᓂᕐᒧᑦ ᑯᐊᐳᕇᓴᒃᑯᖏᓐᓂ − ᑕᐃᒫᑦᑕᐅ ᓄᓇᓯ ᐱᔨᑦᑎᕋᖅᑕᖏᓐᓄᑦ, ᓲᕐᓗ ᒐᕙᒪᒃᑯᓐᓂ ᓄᓇᕗᒻᒥ ᐊᒻᒪᓗ ᒐᕙᒪᑐᖃᒃᑯᓐᓂ.
ᐊᖏᓪᓕᕙᓪᓕᐊᓗᑎᒃ ᐱᐅᓯᕙᓪᓕᐊᓗᑎᓪᓗ ᐱᓕᕆᐊᖑᔪᑦ ᓛᒐᓂᑦ ᐅᑕᖅᑭᕕᓐᓂᑦ − ᐋᓐᓂᐊᕕᓕᐊᖅᑐᓄᑦ ᐃᓄᓐᓄᑦ ᓇᔪᖅᑕᐅᕙᑦᑐᑦ − ᐊᓯᖏᓪᓗ ᓯᕗᓪᓕᖅᐸᐅᑎᒋᐊᓖᑦ ᑕᒪᒃᑯᐊᖑᒻᒪᑕ.
“ᐃᖅᑲᓇᐃᔭᕆᐊᔅᓴᖅ ᕿᓚᓈᑦᑎᐊᖅᑐᖓ,” ᐅᖃᖅᑐᓂ.
ᓴᖅᑭᖅᑕᐅᓚᐅᖅᓯᒪᔪᖅ 1976−ᒥ, ᓄᓇᕗᒻᒦᑦᑐᓂ ᓄᓇᓯ ᑯᐊᐳᕇᓴᒃᑯᑦ ᐱᕈᖅᐸᓪᓕᐊᑎᑦᑎᓇᓱᐊᖅᑎᐅᓪᓗᑎᑦ ᐃᓪᓗᓕᓂᐅᕐᓂᕐᒥᑦ, ᓂᐅᕐᕈᑎᖃᕐᓂᕐᒥᑦ ᐃᓪᓗᐊᓗᓐᓂᒃ, ᓱᓇᒃᑯᑕᕐᓂᓪᓗ, ᐃᓗᐃᒃᑲᐅᓈᕐᓗᒋᑦ ᐅᖅᓱᐊᓗᓐᓂᑦ ᑐᖅᑯᐃᕕᓐᓂᑦ, ᐸᕐᓇᓂᕐᒥᑦ ᓱᓇᒃᑯᑖᕐᓂᓪᓗ ᐊᑐᐃᓐᓇᖃᕐᓂᕐᒥᑦ.
ᐊᓐᓂᕐᒥᐅᖅ ᒫᓐᓇᕈᓗᒃ ᐱᖁᔭᓕᕆᓂᕐᒥᑦ ᐊᕕᑦᑐᖅᓯᒪᔪᓂᓪᓗ ᐅᖃᐅᔾᔨᒋᐊᖅᑎᐅᓚᐅᖅᑐᖅ ᑭᐅᕈᓚᓐ ᐸᓇᑦᑐᒧᑦ, ᒥᓂᔅᑕ ᒐᕙᒪᑐᖃᒃᑯᓐᓂ. ᑕᐃᑲᓂ, ᐊᓐᓂᕐᒥᐅᖅ ᑲᒪᓚᐅᖅᑐᖅ ᐃᓄᐃᓪᓗ-ᒐᕙᒪᑐᖃᒃᑯᓪᓗ ᐱᓕᕆᖃᑎᖏᓐᓂ ᑲᑎᒪᔨᕋᓚᓐᓂᒃ ᐊᒻᒪᓗ ᐃᓄᐊᖅᑕᐅᓯᒪᔪᓂᒃ ᔭᒐᓯᒪᔪᓂᒃ ᓄᓇᖃᖅᑳᖅᑐᒥᓂᕐᓂᑦ ᐊᕐᓇᓂᑦ ᓂᕕᐊᖅᓯᐊᓂᓪᓗ. ᐊᕐᕌᒎᓐᓂᒃ ᒪᕐᕉᓐᓂᒃ, ᐊᐅᓪᓚᖃᑕᐅᖃᑦᑕᓚᐅᖅᓯᒪᔪᖅ ᒥᓂᔅᑕᒧᑦ ᐸᕐᓇᖃᑦᑕᖅᑐᓂᓗ ᐅᖃᐅᓯᐅᓂᐊᖅᑐᓂᒃ.
ᐃᓚᒋᔭᐅᓚᐅᖅᓯᒪᔪᖅ ᔮᓐᓄᐊᕆᒥ 2019−ᒥ ᒪᒥᐊᑦᑎᓪᓗᒍ ᐸᓇᑦ ᐊᕐᕕᐊᓂ ᒐᕙᒪᑐᖃᒃᑯᓐᓂᙶᖅᑐᓂ ᐱᖁᔭᖅᑎᒍᑦ ᐃᓱᒪᖅᓱᖅᑎᑕᐅᓐᓇᑎᑦ ᐃᓄᐃᑦ ᐊᐅᓪᓛᖅᑕᐅᓐᓂᓚᐅᖅᓯᒪᓂᖏᓐᓄᑦ.
“(ᐱᓕᕆᐊᕋ) ᖃᐅᔨᒪᑦᑎᐊᕋᓱᐊᖅᑐᓂ (ᒪᒥᐊᓐᓂᐅᔪᖅ) ᐱᑦᑎᐊᕋᓗᐊᕐᒪᖔᖅ ᐅᑉᐱᕆᔭᖃᑦᑎᐊᕐᓗᓂᓗ ᐃᓄᓐᓂᑦ − ᓇᓗᓇᙱᑦᑐᖅ ᑕᒪᓐᓇ ᐊᔅᓱᕈᓐᓇᓚᐅᖅᑐᖅ ᓄᓇᓕᓐᓄᑦ,” ᐊᓐᓂᕐᒥᐅᖅ ᐃᖅᑲᐅᒪᔪᖅ ᑕᐃᒫᒃ.
ᒐᕙᒪᑐᖃᒃᑯᓐᓃᓚᐅᖅᑎᓪᓗᒍ ᓇᓗᓇᖅᓯᓚᐅᖅᑐᖅ ᓂᕈᐊᕐᓇᐅᒃᑲᓐᓂᓕᕐᖓᑦ ᐅᑐᐱᕆᒥ 2019−ᖑᑎᓪᓗᒍ, ᐊᓐᓂᕐᒥᐅᖅ ᑲᒪᖔᓕᓚᐅᖅᓯᒪᔪᖅ ᐱᖁᔭᓕᕆᓂᕐᒥᑦ ᑐᓴᐅᒪᖃᑦᑕᐅᑎᓕᕆᓂᕐᒥᓪᓗ ᑲᓇᑕᒥ ᑲᑐᔾᔨᖃᑎᒌᓐᓂᒃ ᐱᖃᓐᓇᕇᓐᓄᑦ.
ᐃᓕᓐᓂᐊᕐᓂᕆᓯᒪᔭᖏᑦ
ᐊᓐᓂᕐᒥᐅᖅ ᒍᐊᓪᕝ ᓯᓚᑦᑐᖅᓴᕐᕕᓕᐊᓚᐅᖅᓯᒪᔪᖅ, ᐃᓕᓐᓂᐊᖅᑕᖏᓐᓂ ᐊᕙᑎᓕᕆᓂᕐᒥᑦ ᖁᕕᐊᒋᔭᖃᓚᐅᖅᑐᑦ ᐊᕐᓇᓂᓪᓗ ᖃᐅᔨᓴᕐᓂᕐᒥᑦ.
ᐃᓕᓐᓂᐊᖅᓯᒪᓪᓗᓂᓗ ᓯᓚᕐᔪᐊᑉ ᐅᑭᐅᖅᑕᖅᑐᖓᓐᓂ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᔾᔪᐊᖓᓐᓂ ᐊᒻᒪᓗ ᑲᒪᓯᒪᓪᓗᓂ ᓇᒻᒥᓂᖃᖅᑐᓕᕆᓂᕐᒧᑦ ᐱᕙᓪᓕᐊᓂᕐᒥᑦ ᐃᓕᓐᓂᐊᖃᑕᐅᓪᓗᓂ ᖃᐅᔨᒃᑲᓐᓂᕈᒪᓪᓗᓂ ᐱᓕᒻᒪᔅᓯᒪᒍᒪᓪᓗᓂ ᓄᑖᕐᒥᑦ ᐃᓂᒋᓂᐊᖅᑕᒥᓄᑦ.
ᐱᔭᕇᖅᓯᒪᓪᓗᓂᓗ ᒪᕐᕉᓐᓄᒃ ᐊᕐᕌᒎᓐᓄᒃ ᓄᓇᕗᑦ ᓯᕗᓂᔅᓴᕗᒻᒥ ᐸᕐᓇᓂᕐᒧᑦ ᐃᓕᓐᓂᐊᖅᑐᓂ. ᑭᖑᓂᖓᓐᓂ, ᐊᑎᓕᐅᖅᑐᓂ ᑲᓇᑕᒥ ᓯᓚᕐᔪᐊᒥ ᐃᓅᓱᑦᑐᓄᑦ ᐃᓕᑦᑎᐊᓕᐊᓚᐅᖅᓯᒪᔪᖅ ᑕᖅᑭᓄᑦ ᐱᖓᓱᓄᑦ ᑕᐃᑲᓃᑦᑐᓂ. ᐅᑭᐅᓄᑦ ᖁᓕᐅᓗᐊᓕᖅᑐᓄᑦ ᑕᒪᓐᓇ ᐊᓂᒍᖅᓯᒪᓕᖅᑑᒐᓗᐊᖅ, ᑭᓯᐊᓂᓕ ᐳᐃᒍᔾᔮᖏᑦᑎᐊᖅᑐᖓ ᐊᑐᓚᐅᖅᓯᒪᔭᖓ ᑕᐃᔅᓱᒪᓂ.
“ᓄᓇᓕᓐᓃᙶᖅᑐᓂ ᐃᓄᓕᓐᓂᑦ 1,500−ᓂᑦ ᐃᓄᒋᐊᕐᔪᐊᕌᓗᒻᒦᓕᖅᑐᓂ ᐊᔾᔨᒋᓐᖏᑕᕐᔪᐊᕌᓗᖓᓐᓂ ᐊᑐᖅᐸᑦᑕᕕᑦ ᐊᔾᔨᒋᙱᑦᑎᐊᖅᑕᖓᓐᓂ, ᐅᐃᒃᑲᓂᕐᓇᖅᑑᔮᒻᒪᕆᒻᒪᑦ ᐊᑲᐅᒋᔭᓐᓃᒍᓐᓃᖅᑐᑎᓂ ᐊᖏᕐᕋᒥ,” ᐅᖃᖅᑐᓂ.
ᐸᓐᓂᒥᖅᑑᒥ ᐱᕈᖅᓴᓚᐅᖅᓯᒪᔪᑦ ᐊᕙᑎᓄᑦ ᐅᑭᐅᓄᑦ ᖁᕕᐊᒋᑦᑎᐊᓚᐅᖅᓯᒪᔭᖓ ᐊᐅᓪᓚᖃᑦᑕᕈᓇᓚᐅᖅᓯᒪᒻᒪᑦ ᓄᓇᒧᑦ ᐃᓚᒌᑦᑐᑎᑦ. ᑕᓯᕐᒥᑦ ᐃᖃᓗᒐᓱᖃᑦᑕᖅᓯᒪᓪᓗᓂ ᐊᒥᓱᐊᖅᑎᓪᓗ ᐅᐱᕐᖏᔭᖅᑐᖃᑦᑕᖅᓯᒪᓪᓗᓂ ᖁᕕᐊᒋᓪᓚᕆᑦᑐᓂᐅᓪᓗ.
ᐃᖅᑲᐅᒪᔪᖅ ᓇᑦᑎᓯᐅᕆᐊᖅᓯᒪᓪᓗᑎᑦ ᐊᑖᑕᒌᒃ, ᐊᓪᓗᕐᒥ ᐅᑕᖅᑭᐅᖅᑐᑎᒃ ᐊᓐᓂᕐᒥᐅᒃᑯᑦ, ᐅᑭᐅᖃᖅᑐᓂ 12−ᓂᒃ ᓯᕗᓪᓕᖅᐹᑦᑎᐊᕐᒥ ᓇᑦᑎᕋᓱᓚᐅᖅᓯᒪᔪᖅ ᑕᐃᔅᓱᒪᓂ.
ᑎᒍᒥᐊᖏᓐᓇᖅᑕᖓ ᑕᒪᓇ.
“ᐅᐱᒋᑦᑎᐊᓚᐅᖅᓯᒪᔭᖓ ᐊᑖᑕᖓᑕ,” ᐃᖅᑲᐅᒪᔪᖅ ᐊᑖᑕᖓ ᖁᕕᐊᓐᓂᖓᓐᓂ ᐊᔾᔨᐅᓚᐅᖅᓯᒪᙱᒻᒪᑦ.
ᐊᒥᓱᑦ ᐅᑭᐅᑦ ᐊᓂᒍᖅᓯᒪᓕᖅᑎᓪᓗᒋᑦ, ᐊᓐᓂᕐᒥᐅᖅ ᐊᔾᔨᒋᓐᖏᑕᖓᓂ ᐱᓕᕆᓕᓚᐅᖅᑐᖅ, ᑕᐃᒃᑯᐊᑎᑐᑦ ᐱᒃᑯᒋᑦᑎᐊᖅᑕᖏᑎᑐᑦ ᐱᓕᕆᓕᖅᑐᓂ.
“ᐃᓄᐃᑦ ᖃᓄᕈᓘᔮᓗᒃ ᑲᔪᓯᑦᑎᐊᕐᖓᑕ ᐱᐅᑦᑎᐊᖅᑐᓂᓗ ᑕᑯᖃᑦᑕᖅᑐᒋᑦ ᑕᒪᒃᑯᐊ ᑲᔪᓯᑦᑎᐊᖅᑐᐊᓗᐃᑦ, ᐱᓗᐊᖅᑐᒥᑦ ᐃᓄᐃᑦ ᐊᕐᓇᐃᑦ,” ᐅᖃᖅᑐᓂ. “ᐅᑭᐅᓂᒃ ᒫᓐᓇᕈᓗᒃ ᐊᓂᒍᖅᑐᓂᒃ, ᑕᑯᓯᒪᒐᒪ ᐃᓄᓐᓂᑦ ᐊᕐᓇᓂᑦ ᓯᕗᒃᑲᖅᑕᐃᕙᑦᑐᓂᑦ ᐃᖅᑲᓇᐃᔭᒥᓂᒃ, ᓴᓇᙳᐊᕐᓂᒃᑰᒐᓗᐊᖅᑲᑦ ᑲᑎᒪᔨᐅᓂᖅᑎᒎᒐᓗᐊᖅᑲᓪᓗ. ᑲᒪᒋᓪᓚᕆᑦᑕᒃᑲ ᑕᐃᒪᐃᑦᑐᑯᓗᐃᑦ ᐱᔪᓐᓇᖅᑐᐊᓗᐃᑦ ᑕᐃᒫᑦᑕᐅ ᓯᕗᒃᑲᖅᑕᐃᒍᒪᒻᒥᒐᒪ ᐃᔾᔪᐊᕋᓱᑦᑕᒃᑲ ᑕᐃᒪᐃᑦᑐᑯᓗᐃᑦ.”